BALE NA RONALDO WATACHEZA VYEMA PAMOJA – RONALDO DE LIMA.

MSHAMBULIAJI nyota wa zamani wa kimataifa wa Brazil, Ronaldo de Lima amedai kuwa hana shaka kuwa Gareth Bale na Cristiano Ronaldo watatengeneza muungano mzuri katika klabu ya Real Madrid. Bale mwenye umri wa miaka 24 alitua Santiago Bernabeu kwa uhamisho uliovunja rekodi wa euro milioni 100 katika kipindi cha usajili wa majira ya kiangazi na kuzidi kiwango ambacho Madrid walimnunua Ronaldo kutoka Manchester United mwaka 2009. Hata hivyo, nguli huyo wa soka wa Brazil hadhani kama kuwasili kwa mchezaji mwingine mwenye jina kwenye klabu hiyo kutamuathiri Ronaldo na kudai kuwa watacheza vyema wakiwa pamoja. Ronaldo amesema wawili hao watawapa furaha mashabiki wa Madrid kutokana na umahiri wao wa kucheza na kutengeneza nafasi za kufunga. Bale anatarajiwa kucheza mechi ya kwanza akiwa na Madrid mwishoni mwa wiki hii dhidi ya Villarreal.